„Орце“ со највисок просек, а тетовското „Гоце Стојчески“ со најнизок

Министерството за образование и наука ги сумираше просечните оценки во сите средни училишта во земјава за ланската учебна 2016/2017 година. Според оваа листа на министерството, најдобар просек на оценки има скопската гимназија „Орце Николов“ со 4.18. Следуваат „Р. Ј. Корчагин“ со 3.98, „Никола Карев“ со 3.74, „Георги Димитров“ 3,68. Гимназијата е петта по успехот според оценките со просек од 3,4. Најнизок просек меѓу скопските училишта имаат СУГС „8 Септември“ со 2,17 и „Лазар Танев“ со 2,37.

На општинско ниво највисоки оценки во гевгелиската гимназија „Јосиф Јосифовски“ со просек 3,65, па „Ванчо Прке“ од Виница со 3,52. Секако, има општински училишта со повисок просек, но бидејќи во таа општина има и други училишта, просекот опаѓа. Така е на пример со битолската гимназија „Ј. Б. Тито“, кумановската “Гоце Делчев“, охридската “Св. Климент Охридски“ и сл.

Министерството го пресметува овој просек според оценките во Е-дневник: се собираат сите оценки од секој ученик до прва до четврта година, за секоја паралелка, за секое училиште и се сумира за сите општини. Како недостаток на оваа методологија е што во просекот на училиштата влегуваат и тригодишните програми, најчесто стручните, така што автоматски се намалува сумата на оценки.

Од МОН велат дека оваа листа во иднина посериозно ќе се третира и доработува. Слично на праксата во повеќето европски земји, се планира рангирање на училиштата кое ќе биде јавно (на веб страницата на МОН) и ќе му послужи како параметар за успех и очекувања на идниот средношколец.

Очекувани и реални резултати

Од секторот за средно образование при МОН оваа листа е реален одраз на успехот во училиштата, но дека е далеку под очекувањата. Од министерството велат дека ако имаме ученици кои се запишуваат со сите петки добиени во основното образование, зошто тогаш нивниот успех опаѓа во средно? Досега во МОН нема детална анализа, но искуствено ова се должи на неколку причини. Првенствено е факторот пубертет и промена на средината, друштвото кои значително се одразуваат и на успехот, особено впечатливи во прва година. Но, исто така како причина е и различниот, релативно попопустлив  критериум за оценување во основните училишта за разлика од построгите колеги професори во средните.

Како до подобар успех?

Во МОН велат дека клучното решение е во навремено насочување на ученикот каде да го продолжи секундарното образование. – Битно е јакнењето на улогата на кариерните центри не само во средните, туку и во основните училишта. Неретко се случува ученик кој има афинитети за цртање, без разлика дали е за уметност или проектирање во градежништво, под притисок на семејството или општествените норми да се запише медицина или менаџмент. Тој ученик нема да биде мотивиран да го даде својот максимум. – велат во МОН.