Активирај се | Создадено од вас |

По стапките на Св. Климент Охридски

feat-img

Ученици од гимназијата „Георги Димитров“ од Скопје учеа за ликот и делото на Св. Климент Охридски. Но, учеа одејќи по неговите стапки: низ струшко и охридско. Напишаа патепис и снимија видео репортажа.

Автор: Надица Танева Јанева

Во рамките на манифестацијата „Одбележување на значајни настани и личности од областа на образованието“ со поддршка на Град Скопје, Сектор за образование, СУГС „Георги Димитров“ – Скопје учествуваше со реалиаација на проектот насловен „По стапките на Св. Климент Охридски“.

Целта на овој проект е учениците на непосреден начин да го проучат ликот и делото на Свети Климент Охридски, еден во низата просветители кои оставија неизбришлива трага во просветителската дејност на овие простори. Да се научи нешто повеќе од учебниците, интернетот, лексиконот или енциклопедијата е вистински предизвик за современиот ученик. По стапките на Свети Климент Охридски значи на лице место да се почувствува природата, црквата, манастирот, езерото, воздухот… опкружувањето кое не врати неколку века наназад .

Нашето истражување започна со истражување за ликот и делото на големиот просветител на 14 члената група ученици од изворите на податоци кои им се секојдневно достапни. Веќе навлезени во деталите за неговиот лик и дело се упативме по стапките…

Прва дестинација МПЦ Свети Климент Охридски во селото Горна Белица, Струшко и неповторливата можност да се види, допре и почувствува се што претходно само се прочитало. Видовме каде и како Свети Климент Охридски ја вршел својата мисија, го почувствувавме мирот во кој творел и создавал ненадминливи дела и непроценливи вредности. Следна дестинација Св. Пантелејмон, Охридско. Надополнување на сите сетила со нови информации и знаења. Прибираме материјали да создадеме дело достојно за спомен на големиот просветител.

Се враќаме полни со впечатоци. Еден ден поголем од сите обични, вообичаени. Еден ден кој не исполни и поттикна на нови знаења.

Средување на впечатоците, знаењата, материјалите, емоциите. Направивме фотографии, изложба, видео. Со единствена цел да ви пренесеме дел од она што го видовме и научивме за да остане сочувано од заборавот… Ние се потрудивме да биде незаборав.