Медиумски објави |

Радио МОФ: Како образовниот систем да се справи со медиумската писменост

feat-img

На полето на медиумска писменост во образованието се работи, но недоволно и несистематски, беше заклучокот од конференцијата со наслов „Медиумската писменост во Македонија: во или вон образованието“, која се одржа во Скопје во организација на Високата школа за новинарство и односи со јавноста, пишува Мета.

 

Едукацијата за медиумската писменост е неопходна во основното и средното образование во земјава, но прашањето е како таа да се постави во рамките на образовниот систем, при што се појавуваат многу пречки кои бараат заедничка акција за нивно надминување.

Проблеми има со едукација на самите наставници, потоа како предизвик се појавува и фактот што во многу училишта се работи во две смени, така што тие се среќаваат со недостиг на простор во кој на оваа тема би се работело после часовите, евентуално како дел од факултативната настава.

radio mof kako obrazovniot sistem da se spravi so med pismenost 2

На конференцијата се дискутираше и за тоа, дали таа да биде посебен предмет или не, и беше посочено дека во часовите по македонски јазик веќе се зачнуваат и теми од медиумската писменост, со цел на учениците да им се помогне во справувањето со лажните вести и политичките манипулации кои секојдневно се појавуваат во медиумите.

Сепак, се смета дека технологијата, која денес е достапна и на располагање како никогаш досега, ќе биде од голема помош во медиумското описменување и во рамките и надвор од образовниот процес, а беше презентирана и Стратегијата за образование 2018-2025, која треба да даде насоки како ќе се одвива медиумската писменост во образовниот процес.

Сите овие прашања ги расправаа професори и наставници, како и претставници од Министерството за образование и наука, Бирото за развој на образованието, Канцеларијата на Европската унија во Скопје, како и претставници од невладиниот сектор и од медиумите.

radio mof kako obrazovniot sistem da se spravi so med pismenost 3

На конференцијата беа промовирани и иницијативите на ова поле како што се Коалицијата за медиумска писменост и Мрежата за медиумска писменост, во која членуваат редица невладини организации и која работи со поддршка на Агенцијата за аудио и аудио и медиумски услуги (АВМУ).

За тоа како граѓанскиот сектор во Велика Британија работи на полето на медиумската писменост говореше Лидиа Ел Кури од Институтот за различности во медиумите до Лондон, а беа претставени локални и медиумски иницијативи на овој план.

На конференцијата учествуваа осум граѓански организации и осум медиумски партнери во рамките на Коалицијата за медиумска писменост што во 2016 ја основаше Високата школа за новинарство  со цел да се унапреди  медиумската писменост во земјата. Дел од Коалицијата за медиумска писменост беа и Радио МОФ со НМСМ проектот „Младинска медиумска писменост“.