Техники на манипулација

Користење претеран јазик

Користењето зборови и изрази како ХАОС, УЖАС, СТРАВ, ОПАСНОСТ, во врска со појавата на змии во општина Аеродром, е употреба на претеран јазик (loaded language) и може да предизвика паника меѓу граѓаните. Кога се споделуваат вакви информации, мора да се внимава јазикот да биде соодветен на вистинската состојба.

Неверодостојни фотографии

Главната фотографија која ја споделуваат сите медиуми како доказ за појавата на змии во општина Аеродром и која како илустрација во соопштението на СДСМ е преземена од постот на граѓанската организација „Ново Лисиче“ е симната од интернет, од австралиска веб-страница. Во медиумите приказната се илустрира и со други фотографии од опасни змии кои се избрани за да делуваат страшно за публиката. Изборот и употребата на неавтентични и неверодостојни фотографии во медиумите и на социјалните мрежи е неодговорен и вестите ги прави лажни.

Предимензионирање на ситуацијата (од мува – слон)

Во соопштението на СДСМ се говори за ЕНОРМНА ПОЈАВА НА ЗМИИ, а всушност се видени само две, и тоа една жива во запуштената трева кај кулите на „Џевахир“ и една кожа од преслечена змија на тротоар кај маркетот „Тинекс“. Преувеличувањето на состојбите е особено неодговорно кога станува збор за опасности по животот и здравјето на децата.

Злоупотреба на ПР-алатките

ПР-от по правило се користи за да ги нагласува, да ги афирмира добрите страни и успеси, а да ги крие лошите и неуспесите, ама при афирмацијата на успесите не смее да се служи со невистини.

Мешање баби и жаби

Се користи изразот „нови 1300 км патишта“ за се што е направено, а нови се само 13 км. Таа бројка од 1300 км може евентуално да важи за вкупно изградени нови, реконструирани и рехабилитирани стари патишта, завршени веќе започнати патишта, локални улици и сокачиња итн. итн. Но и тоа за вкупно патишта гледаме дека се оспорува бројката од 1300 км.

Китење со туѓо перје

Прикажување на туѓиот успех како сопствен, познато како китење со туѓо перје. Во случајов, во 1300 км патишта, премиерот и неговиот пи-ар ги вбројува и патиштата што ги направила или барем во добар дел ги изградила претходната власт.

Злоупотреба на мистерии

Теориите на заговор се хранат од мистерии. Ако некои настани се обвиени со велот на тајната, кога станува збор за човечки жртви во масовни убиства, атентати на познати личности, војни и преврати, пандемии со вируси, поплави, земјотреси, цунамија во кои страдаат луѓе, особено ако нема брза разрешница и одговор на прашањето што ги предизвикало, се плетат заговорнички приказни. Чудната сина светлина неколку секунди пред земјотресот во Турција е навистина морничава и невообичаена и злоупотребена е како доказ за наводна употреба на тектонско оружје за предизвикување земјотреси. Но, сеизмолозите утврдиле дека тоа е т.н. сеизмичка светлина, која се јавува во многу мал дел разурнувачки земјотреси, како на пример оние во Мексико, Чиле, Нов Зеланд итн. 

Страшило за лаици

Теоретичарите на заговор обично ги фетишизираат технолошките пронајдоци и легитимните научни откритија и проекти кои служат за научни истражувања за хумани цели сомневајќи се во нивната наводна злоупотреба како оружје за масовни убиства. Со други зборови, прават страшила од нив, пред се затоа што обичните луѓе не разбираат како тие функционираат, ниту пак имаат доверба дека служат за хумани цели. Таков е случајот со проектот за испитување на јоносферата ХААРП, кој според научниците не може да предизвика ниту промена на временските прилики, а не пак земјотрес, како и осцилаторот со висока фреквенција на Никола Тесла, кој според научниците нема моќ да ги раздвижува тектонските плочи. 

Измислување докази

За да ја докажат теоријата на заговор, оние што ја пласираат, измислуваат и фалсификуваат докази чија проверка не е тешка, но сепак е потребно да побарате прецизни информации, за што многу луѓе ниту имаат време, ниту пак волја да пребаруваат. Во случајот на земјотресот во Турција, како доказ дека е вештачки предизвикан, лиферувана е измислица дека земјотресот немал епицентар, туку линија на потреси. Тоа, се разбира, е безочна лага, зашто епицентарот бил лоциран 37 километри северозападно од градот Газиантеп. Измислено е и дека секој нареден потрес, афтер-шок, бил посилен од првиот удар, 7,8 степени по Рихтер, што е груба невистина. Сите афтер-шокови биле со помал интензитет! 

Случајни совпаѓања

Теоретичарите на заговор користат одредени настани кои случајно се совпаѓаат со настанот кој е предмет на заговорничката теорија и со нивно тенденциозно и лажно прикажување, потоа коинциденциите служат како божемен доказ за заговорот. Таков е случајот со тврдењето дека западните земји знаеле дека ќе се случи катаклизма, ги затвориле своите амбасади од Турција и ги повлекле амбасадорите. А вистината е дека девет држави од Европа неколку дена пред земјотресот во Турција објавиле дека ги затвораат своите конзулати во Истанбул за прием на странки, а некои дури издале и предупредувања за нивни државјани да не се движат во одредени делови од градот поради страв од евентуални терористички напади – како одмазда за палењето на Куранот во Шведска и други европски градови. Немало повлекувања на амбасадори и затворање на амбасадите во Анкара. Настаните случајно се совпаднале, но грубо биле злоупотребени од теоретичарите на заговор. 

Злоупотреба на авторитети

За продажба на истиот чај „Паразол“ во лажна реклама се јавува и имунологот д-р Вело Марковски.

Измамниците со лажни лекови ги злоупотребуваат и имињата на д-р Сашко Кедев, кој, пак, препорачува средство за намалување на притисокот, д-р Никола Тодоров, поранешен министер за здравство, но не е лекар, а рекламира маст против габична инфекција!

Д-р Арбен Таравари, кој е невролог, но рекламира производи што ќе ви помогнат брзо да ослабите...

Сите тие постојано ги демантираат лажните вести и злоупотребата на нивниот авторитет. За жал, повеќе од една година од истрагата на МВР се уште нема никаков резултат.

Маркетинг трикови

Во продажбата на лажните лекови вообичаено се користат познати трикови од онлајн маркетингот.

„Само во оваа прилика лекот може да го добиете по половина цена!“

„Побрзајте, купете го во следните 24 часа или понудата ќе исчезне!“.

„Количините се ограничени и јавете се веднаш, нашите оператори ве очекуваат“…

Се разбира, ако чајот сакате да го купите по редовна цена, нема таква можност, ниту пак понудата ќе исчезне!

Симулација на научни методи

За измамата да биде што поефектна, се симулираат научни методи.

Прво треба да решите тест во кој ќе откриете дали имате паразитска инфекција.

Прашањата се банални – колку често се чувствувате уморни, дали страдате од несоница, имате ли дијареја, запек, главоболка, настинка, вознемиреност, лутина, стрес…?

Кој од нас нема некој од овие проблеми? Но, без оглед дали ќе одговорите на прашањата со „многу често“, „ретко“ или „никогаш“, на крајот добивате ист резултат:

„За жал, постои 92 отсто шанса да имате паразити во вашето тело!“

А клиничките испитувања од кои наводно ви прикажуваат резултати, не можете никаде да ги најдете, освен во рекламата!

Игнорирање на мејнстрим науката

Ако некој тврди дека открил нешто спектакуларно, а откритието може да се докаже со научна експертиза, логично е да им дозволи на врвните експерти од областа да го потврдат неговото откритие. За да ја убедат јавноста дека нивните сензационални откритија се автентични, во трката по лесно заработени пари и светска слава, измамниците умеат да се повикаат и на авторитети од соодветната област. Се разбира, важно е да го провериме и кредибилитетот на авторитетите. Сепак, секое наводно откритие кое ја игнорира мејнстрим науката, дотаму што тенденциозно ги исклучува највисоките научни и академски авторитети од можноста тие да ги проверат резултатите од истражувањето и да ги утврдат фактите во врска со откритието е сигнал за сомневање дека е во прашање измама – лажна вест.

Теории на заговор

Откако жртвата ќе биде преплашена, измамниците ја тешат – „Не грижете се, има спас! Има лек, но здравствените власти го кријат и затоа го нема во аптеките!

Овде се прави нова манипулација – користење на теорија на заговор.