Рамазан: месец на духовно размислување и великодушност

Рамазан е месец на духовно размислување и великодушност за милиони муслимани ширум светот. Како еден од најважните месеци за следбениците на исламската вероисповед, Рамазан е натопен во традиција и е суштински дел од исламскиот календар.

Според исламската традиција, Рамазан е месец кога првите стихови од Куранот му биле откриени на пророкот Мухамед пред повеќе од 1.400 години. Тоа е време на пост, молитва и воздржаност и се смета за еден од столбовите на исламот. Постот за време на Рамазан е задолжителен за сите здрави возрасни муслимани и има за цел да го прочисти телото и душата.

Но, Рамазан е многу повеќе од само пост. Муслиманите бараат прошка за минатите гревови, се молат за водство и помош во отпорот на секојдневните зла и се обидуваат да се прочистат преку воздржаност и добри дела. Муслиманите исто така мора да се молат што е можно почесто за време на Рамазан и да ја читаат светата книга Куран.

„Ова драгоцено време да размислуваме за нашите животи, на индивидуално ниво, е повеќе од неопходен луксуз! Тоа е уникатен месец на самоанализа и испитување на нашите морални и духовни вредности и одговорности. Преку постот, муслиманите ја доживуваат болката од глад и жед и учат како да се справат со тоа со трпение“, вели Зурјет Сулејмани, претседател на Исламскиот форум.

Во текот на овој месец џамиите се полни за време на петте молитви, а се слави и Ноќта на моќта, каде добрите дела вредат повеќе од оние од 1.000 месеци. Рамазан е познат и како месец на милосрдието и солидарноста, при што разни хуманитарни организации организираат ифтари за сиромашните и сираците.

Во денешно динамично време, технологијата го олесни поврзувањето со другите муслимани ширум светот за време на Рамазан, со организирање виртуелни ифтари и онлајн молитви. Сепак, суштината на Рамазан останува иста: време за духовно размислување, самодисциплина и великодушност кон другите.

„Меѓу петте столба на исламот е постот, кој се разликува од другите религии, а меѓу нив е постот за време на светиот месец Рамазан. Ефектот на Рамазан е нешто друго што човекот треба да го почитува пред да пости со стомак, мора да пости со јазикот, очите и со ушите“, вели оџата Нухи Ганија.

Тој додава дека во свет каде што на индивидуализмот често му се дава приоритет над заедничката благосостојба, Рамазан нуди потсетник за важноста на великодушноста, солидарноста и саморефлексијата.

Автори: Аднан Камбери, Јусра Камбери, Фатиме Фазљији, Фатос Груби, Кудрет Феризи

Текстот е изработен како дел од Мастер часовите за медиуми и новинарство, кои ги организираа Институтот за комуникациски студии и ИРЕКС во рамките на УСАИД проектот за медиумска писменост „Младите размислуваат“.