Пријави се за работилници за филмска писменост

Како се користи филмската монтажа за менување на контекст? Како да се испрати порака преку кадрирањето? Ако си средношколец/ка и сакаш да стекнеш применливи вештини за фотографирање или монтирање, пријави се на двете работилници на Филмскиот фестивал за млади „Џифони Македонија“, што ќе се одржат од 5 до 10 октомври во Скопје.

На работилницата „Филмската монтажа како алатка за менување на контекст“ ќе научиш да создаваш различни значења од истиот снимен материјал единствено преку процесот на монтажа. Во тим со други учесници, ќе работиш на многу кратки филмови кои во себе ќе содржат две различно измонтирани верзии на истиот материјал и ситуација. После работилницата, ќе умееш да ги препознаваш суптилно испратените пораки во медиумите и филмовите и како тие влијаат врз публиката, но и да го користиш визуелниот јазик правилно и креативно при снимање и монтирање.

На работилницата „Испраќање порака преку кадрирањето“ ќе научиш да раскажуваш приказна со слики која ќе остави емотивен и интелектуален печат врз гледачот. Со практична работа, ќе развиеш основни универзални вештини за фотографирање и ќе го научиш концептот за визуелно раскажување преку изработка на фотографии кои ќе треба да пренесуваат поинаква порака и емоција.

Пријави се и избери ги работилниците „Фотографија“ или „Филмска монтажа“ со пополнување на ОВАА ПРИЈАВА.

Најдобриот производ од секоја работилница ќе биде награден, а сите учесници ќе добијат сертификати.

Работилниците за филмска писменост се организираат од Институтот за комуникациски студии (ИКС) и ИРЕКС во рамките на проектот за медиумска писменост на УСАИД, „Младите размислуваат“.